Состојбата на источниот фронт е „значително влошена во последните денови“, соопшти денеска украинскиот врховен командант Олександар Сирски, нагласувајќи го „интензивирањето“ на офанзивата на руската армија, особено во правец на Часив Јар.
„Ситуацијата на источниот фронт значително се влоши во последните денови. Ова главно се должи на големото засилување на непријателската офанзива по претседателските избори во Русија“, што се одржаа во средината на март, напиша тој на Телеграм.
Руската армија ги напаѓа украинските позиции во секторите Лиман и Бахмут „со јуришни групи со поддршка на оклопни возила“, како и во секторот Покровск, додаде тој. „Ова е можно поради топлото и суво време, што го прави најголемиот дел од областа достапна за тенкови“, објасни Сирски.
Часив Јар под постојан оган
И покрај загубите, руската армија распоредува „нови оклопни единици“, овозможувајќи и да постигне „тактички успеси“. Русите го засилија притисокот околу Часив Јар во последните денови и таа клучна источна позиција сега е „под постојан оган“, според Киев.
Градот на врвот на ридот е на помалку од 30 километри југоисточно од Краматорск, главниот град на регионот контролиран од Украина и важен железнички и логистички центар за украинската војска. Сирски потврди дека се зајакнати „најпроблематичните“ области, особено со противвоздушната одбрана.
„Повторно се поставува прашањето за техничка супериорност во областа на високотехнолошки оружја“, рече тој. Тоа е единствениот начин на кој можеме да го победиме големиот непријател“, додаде украинскиот командант, оценувајќи дека е неопходно и „да се подобри квалитетот на обуката на воениот персонал“.
Киев со месеци бара од западните сојузници повеќе муниција и системи за противвоздушна одбрана. Но, помошта истекува поради политичките блокади во Вашингтон, принудувајќи ги украинските војници да чуваат муниција.
