Почна реконструкцијата на тротоарот на улицата „Народен фронт“

67

Почна реконструкцијата на тротоарот по целата должина на улицата „Народен фронт“ во населбата Капиштец.

Од Општина Центар информираат дека тротоарот е 40% оштетен поради што е небезбеден за пешачење, особено за повозрасните граѓани и мајките со колички и бебиња.

Во следниот период оштетените и искршени коцки ќе бидат заменети со нови, а останатите ќе бидат нивелирани. Градоначалникот на Општина Центар Горан Герасимовски потенцира дека вложувањето во реконструкција на тротоарите е влог во безбедноста на пешаците и другите учесници во сообраќајот.

-Започнавме со реконструкција на тротоарите пред полниот ек на сончевите денови и зголемената фреквенција на граѓани. Тротоарот е оштетен и бара санирање за непречено и безбедно пешачење на сите граѓани. Ќе биде реконструиран долж целата улица од околу два километри. Зафатот треба да биде завршен за околу еден месец по што граѓаните ќе може непречено да го користат за утрински или попладневни прошетки – вели Герасимовски.

Општина Центар изминатиот период реконструираше тротоари на неколку улици, изведе нови пешачки патеки со кои го олесни пристапот за движење на граѓаните. И во иднина продолжува да вложува во подобра инфраструктура за побезбеден сообраќај на возачите и пешаците.