Во Музејот на Град Скопје, на 17 декември со почеток во 20 часот ќе се одржи свеченото доделување на книжевната награда за најдобар необјавен роман на годината – „Пегаз“.
На настанот ќе биде промовиран и победничкиот роман од конкурсот за 2019 година – „Насон прочитана книга“ од авторката Соња Манџук. Промотор на книгата ќе биде Ѕвездан Георгиевски од Фондацијата „Славко Јаневски“. На конкурсот пристигнале 77 ракописи, а за победникот одлучија Димитар Башевски, писател и издавач, Иван Шопов, писател и Бисера Бендевска, уредничка во „Арс Ламина“.
Во краткиот опис за книгата се вели: „Тоа беше мала книшка по обем, со сосема обични корици, еднобојни, но допрени од времето, личеа на печена глина и го имаа оној карактеристичен мирис на стара хартија. Сосема обично и логично. Насловот: Adeptus Anonimus – Sommnium. Година на издавање 1890, Лондон. Издавач: Теозофско Друштво. Морав да седнам. И седнав во еден ќош. Изненадувањето ми беше огромно, но не знам дали поради него, со голема брзина во мојата глава минуваа и се менуваа и Борхесовиот сон и еден одамна прочитан и заборавен сон на Јунг, а го видов и Успенски – иако не знаев како изгледа – како ѝ вели на една мачка: Ако е ова сон, оваа мачка нека се престори во пес“.
