Макрон во неделата пристигна во тридневна посета на Германија, што е прва посета на шеф на француска држава на Германија по 24 години, а беше пречекан од германскиот претседател Франк-Валтер Штајнмаер.
Макрон рече дека посетата доаѓа во „клучен момент за Европа“, пред се поради војната во Украина.
„Мора да се соочиме со империјалистичката аспирација во Европа… тоа подразбира зајакнување на француско-германските односи“, рече Макрон по приемот во претседателската палата.
Претседателот на Германија Франк-Валтер Штајнмаер оцени дека Германија и Франција, доколку работат заедно, можат да се справат со геополитичките предизвици на Европа, како што се војните во Украина и Газа и претседателските избори во САД.
Двајцата претседатели денеска ќе отпатуваат за Дрезден, каде Макрон ќе одржи говор, а во вторник францускиот претседател ќе го посети Минстер, на западот на Германија.
По посетата на Минстер ќе следи средба на Макрон, германскиот канцелар Олаф Шолц и министрите на двете земји во резиденцијата на германската влада недалеку од Берлин.