Црковното знаме повторно ќе биде вратено на јарболот во дворот на црквата на Шапка

259

Албанското знаме не е повеќе на јарболот во дворот на црквата “Св. Наум Охридски“ на Попова Шапка. Црковното знаме ќе биде вратено во секој миг.
Лицето кое го симна знамето на МПЦ е приведено.

Ова преку фејсбук го изјави првиот човек на Центарот за управување со кризи, Стојанче Ангелов.

– Брзата реакција на институциите, но и јавниот притисок можат да ги намалат провокациите кои ја потпалуваат меѓуетничката нетрпеливост. Провокациите никако не треба да се премолчуваат туку на нив треба жестоко да се реагира. Само така ќе се обесхрабрат идните потенцијални провокатори. Реакцијата на општеството на вакви провокации треба да биде обединета и единствена без разлика на етничка, верска, политичка или било каква друга припадност. Верувам дека мнозинството Албанци го осудуваат овој варварски чин на сквернавење на црковното знаме. Единствено не видов претставник на албанските политички фактори во Македонија да излезе со јавна осуда на овој чин. А треба – рече Ангелов.

Тој го повика лидерот на ДУИ, Али Ахмети јавно да го осуди овој провокативен вандалски чин.