Во галеријата „Мала Станица” во Скопје вечерва ќе биде отворена изложбата „Дома пред да се стемни“ (Home Before Dark) на украинската уметница Софија Чотирбок.
Како што информираат организаторите „Europe House Skopje“, изложбата произлегува од биографската епизода на уметницата поврзана со барањето за италијанско државјанство што би значело откажување од нејзиното родно државјанство, украинското. Овој настан, се посочува, доведе до повеќеслојно истражување фокусирано на индивидуалната и колективната дефиниција на себството во време кога неговите географски и временски основи стануваат сѐ понеизвесни.
-Почнувајќи од февруари 2020 година, серијата патувања во Украина го означија креативниот процес на повторно откривање на идентитетот и припадноста во постсоветскиот контекст, чии граници и дефиниции сега се уште понејасни и покомплексни од кога било. Почетната точка на уметничкиот процес е архива, место на сеќавање по дефиниција, овде материјализирано во chruščëvka (советски стан) и предметите и сликите што ги содржи, симболични реликвии кои истовремено се и познати и туѓи. Токму во познатите текстури на таписериите и семејните фотографии се артикулира истражувањето со тоа што ги прави видливи, без да ги пополни празнините на меморијата преку низа од мимикрија, бришење и прикривање. Сликите, чии јазици комбинираат автопортретирање, инсценирана фотографија, колаж и архивско истражување, копаат под симболичните хегемонии кои ги обликуваат колективните идентитети и ја откриваат, без да дадат дефинитивно решение, носталгијата на минатото изгубено во слоевите на тајната, севели во најавата на организаторите за изложбата на Чотирбок.
Софија Чотирбок (21.04.1991) е италијанско-украинска визуелна уметница. Таа живее во Милано, каде што дипломирала фотографија на Cfp Bauer во 2019 година. Нејзиното истражување се фокусира на темата на идентитетот во постсоветското општество, миграцијата и архивата како интимна и домашна меморија, трансформирана во универзална човечка материја преку фотографија, видео и ткаенина. Добитничка е на бројни стипендии во Италија и во Украина. Нејзините дела се изложени на големи меѓународни фестивали и музеи, вклучително Saarlandmuseum – Moderne Galerie (2023), Triennale Milano (2021), Paris Photo Off (2022), Odesa Photo Days (2021), Mana Contemporary (Чикаго, 2019). Во 2023 година беше финалист на Giovane Fotografia Italiana #10 и ја имаше нејзината прва самостојна изложба во земјава, во Битола.
Оваа изложба е во контекст на тековната воена агресија на Русија против Украина и има за цел да го поддржи уметничкиот израз и издржливост на Софија Чотирбок во време на конфликт, посочуваат организаторите.
