Европската унија, како главен сојузник на Украина во нејзината војна со Русија, е се повеќе поделена како што минува времето откако Русија ја започна својата таканаречена „специјална воена операција“ на 24 февруари 2022 година, пренесува Ројтерс.
Некои од прашањата кои се наметнуваат се:
Дали е подобро да се судриме со рускиот претседател Владимир Путин или „само“ да го изолираме?
Дали Киев треба да направи отстапки за да ја прекине војната или само ќе го охрабри Кремљ?
Дали построгите санкции против Русија се вредни колатерална штета?
Ова се некои од прашањата кои ја мачат и ја ставаат на тест европската заедница. Според дипломатите, Европската унија никогаш не била под таков притисок и, како што велат, „алијансата е прилично напната“, се додава во анализата на „Ројтерс“.
Целиот свет се бори со зголемената инфлација и зголемените трошоци за енергија. Две европски земји, Италија и Унгарија, се залагаат за прекин на огнот, што во меѓународните дипломатски кругови се толкува како „начин за намалување на
санкциите“ и крај на блокадата на украинските пристаништа, што ја влоши кризата со храна за најсиромашните земји во светот.
Балтичките, скандинавските и некои централноевропски земји, како Полска, тврдат дека не треба да и се верува на Русија и наведуваат дека прекинот на огнот само ќе и помогне на Русија да ги консолидира своите редови и да изврши нови напади.
„Русите го проширија наративот дека ова ќе биде исцрпувачка војна и дека треба да седнеме и да најдеме консензус“, изјави за Ројтерс неименуван висок функционер.
Што мислат светските лидери?
Министерот за одбрана на САД Лојд Остин изјави дека сака да ја ослаби Русија, додека претседателот Џозеф Бајден бара на претседателот на Русија Владимир Путин да му се суди за воени злосторства.
Британскиот премиер Борис Џонсон изјави дека Киев не смее да биде принуден да
прифати лош мировен договор и дека Украина „мора да победи“.
Што се однесува до Германија и Франција, тие се малку двосмислени во своите изјави. Тие ги поддржуваат новите санкции и сакаат да го поразат Путин со „спречување на неговата победа во Украина“.
„Прашањето е дали се враќаме во Студената војна или не. Тоа е разликата меѓу нас, Бајден и Џонсон“, изјави за Ројтерс соработник на францускиот претседател Емануел Макрон.
Самиот претседател Макрон даде свое мислење за тоа како да се спречи Путин.
„Предупредувам дека евентуалниот мир не треба да ја понижува Русија, како што беше случајот во Германија во 1918 година“, рече Макрон. На францускиот претседател му се замерува дека поддржува санкции против Русија, а во исто време
отворено и директно разговара со Путин. Предупредувањето на Макрон дека Русија не треба да се понижува го натера украинскиот министер за надворешни работи Дмитриј Кулеба да рече дека Франција всушност се понижува себеси со ваквиот став.
„Ние го немаме Винстон Черчил во Европската унија. Немаме никакви илузии за тоа“, рече тој.
Ослабување на Русија
Американскиот секретар за одбрана Лојд Остин изјави дека треба да се направи се за да се ослабне Русија. Претставникот на Вашингтон ја коментираше изјавата на министерот за одбрана.
„Сите се фокусираа на првиот дел од она што го кажа Остин, а не на вториот дел. Сакаме да ја видиме Русија ослабена до тој степен што повеќе не може да прави вакво нешто“, изјави неименуван функционер.
Извор од германската влада изјави дека целта на Остин да ја ослаби Русија е проблематична.
„Жално е што германската министерка за надворешни работи Аналена Бербок, од
коалициониот партнер на Шолц, Зелените, ја поддржа таа цел бидејќи го отежнува укинувањето на санкциите, без разлика дали Украина се согласила на мировен договор или не“, рече изворот. Извори од германската влада, исто така, рекоа дека се загрижени дека некои на Запад би можеле да ја поттикнат Украина на нереални воени цели, вклучувајќи го и повторното заземање на Крим, кој Русија го анектираше во 2014 година, што може да го продолжи конфликтот.
Високиот советник на претседателот Володимир Зеленски, Михајло Подољак, сигнализираше дека Украина е сè пофрустрирана.
🇷🇺 must not win, but we won’t give heavy weapons – it may offend Rf. Putin must lose but let’s not impose new sanctions. Millions will starve, but we’re not ready for military convoys with grain. Rising prices are not the worst that awaits a democratic world with such a policy.
— Михайло Подоляк (@Podolyak_M) May 31, 2022
„Русија не смее да победи, но ние нема да испраќаме тешко оружје бидејќи тоа може да ја навреди Русија. Путин мора да загуби, но да не воведуваме нови санкции. Милиони ќе гладуваат, но ние не сме подготвени за воени конвои со
жито“, иронично напиша Подољак, на неговиот Твитер профил.
