Во екот на војната против Хамас – продолжува судењето за корупција на Нетанјаху

32

Во екот на војната против Хамас, судењето за корупција на израелскиот премиер Бенјамин Нетанјаху продолжи по двомесечна суспензија поради нападот на палестинските екстремисти од Газа на југот на Израел на 7 октомври.

Нетанјаху (74) во три случаи е обвинет за измама, нарушување на довербата и поткуп, а тој ги негира сите обвиненија.

Во еден случај што се разгледува пред судот во Ерусалим, Нетанјаху е осомничен дека се обидел да влијае врз поволното покривање на него и неговото семејство на веб-страницата на весникот „Вала“ во замена за усвојување на прописи од кои би можел да има финансиска корист, во износ од стотици милиони долари.

Во друг случај, израелскиот лидер е осомничен дека од 2007 до 2016 година добивал богати подароци, пури, шампањ и накит во вредност од околу 176.000 евра од богати поддржувачи.

Подароци на Нетанјаху и неговата сопруга Сара, меѓу другите, им подари и холивудскиот магнат, Израелецот Арнон Милхан, продуцент на филмовите „Убава жена“, „Борн убијци“, „Бразил“ и „Џ-ЕФ-Кеј“ (ЏФК).

Нетанјаху е осомничен дека промовирал даночни одредби во замена за подароци што би му овозможиле на Милхан да заработи милиони долари, но Министерството за финансии го спречи тоа.

Нетанјаху тврди дека добивал подароци само од пријатели и дека не ги барал, а себеси се смета за жртва на „лов на вештерки“.

Се очекува тој да сведочи за неколку месеци, јавуваат израелските медиуми.

Судењето започна во 2020 година и Нетанјаху е првиот премиер на Израел кому му се суди додека беше на функцијата.

Нетанјаху беше на чело на Владата на Израел од 1996 до 1999 година, потоа од 2009 до 2021 година и повторно е на таа позиција од крајот на минатата година кога формираше коалиција со ултрадесничарските и ултраортодоксните еврејски партии.

Политичките лидери блиски до Нетанјаху го критикуваа обновувањето на судскиот процес среде војната.

Во секој случај, процесот ќе биде помал поради мобилизација на резервисти кои се меѓу сведоците и адвокатите.

„Војна? Жртви? Не не. Најважно е да се рестартира судењето на Нетанјаху“, коментира Дејвид Амсалем, министер за регионална соработка на платформата Икс (Х).