Спасувачите се уште трагаат по можни преживеани од катастрофалниот земјотрес што ја погоди Турција пред 10 дена, а две лица денеска беа пронајдени живи откако десет дена поминале во урнатините.
Во покраината Караманмарас извлечена е четириесет и двегодишна жена која преживеала 257 часа под урнатините, јави „Анадолија“.
Претходно во четврток на југот на Турција е пронајдена жива тинејџерка (17) која поминала 248 часа заглавена под урнатините.
Во земјотресот во Турција загинаа 36.187 луѓе, додека 108.000 луѓе беа повредени.
Според турската Агенција за вонредни ситуации и катастрофи (АФАД) на терен работат повеќе од 253.000 спасувачи.
Најмалку 216.347 луѓе се спасени од погодените области.
„Анадолија“ наведува дека помошта собрана од арапските земји надминала 370 милиони долари.
