Една турска службеничка е тешко ранета во вооружен напад на почесниот конзулат на Шведска во западната турска провинција Измир, а напаѓачот е уапсен, соопштија претставници на медиумите.
Канцеларијата на гувернерот соопшти дека нападот го извршило „ментално нестабилно“ лице во областа Конаг во Измир утринава. Тој не го прецизираше конзулатот.
Нападот се случил пред почесниот конзулат на Шведска, јави приватната телевизија НТВ, а една жена која работела таму како секретарка е ранета и е во критична состојба.
Турските власти го уапсија напаѓачот и отворија истрага, соопшти кабинетот на гувернерот.
Почесните конзулати ги застапуваат интересите на своите граѓани во странство, но со нив не управуваат професионални дипломати.
Ова се случува во време кога Шведска е во дипломатска криза со неколку муслимански земји кои ѝ замеруваат што дозволила сквернавењето на Куранот на нејзина територија.
Вчера двајца мажи запалија примерок од муслиманската света книга пред парламентот во Стокхолм.
На крајот на јуни, истите двајца мажи запалија неколку страници од Куранот пред најголемата џамија во главниот град на Шведска, а на 20 јули го осквернавија текстот, но не го запалија пред ирачката амбасада.
Шведска ги осудува овие навреди, но го брани уставното право на слобода на изразување.
