Општина Куманово продолжува со изградба на улици и канализација во индустриската зона „Речица“. Во зоната претходно веќе беа изградени дел од пристапните улици. Владата пред 1,5 година одвои 20 милиони денари за инфраструктурно уредување на зоната.
– Во тек е поставување на основна траса на пристапен пат со атмосферска канализација во индустриска зона „Речица“ – објави кумановскиот градоначалник Максим Димитриевски.
Зоната се наоѓа на атрактивна локација, непосредно до автопатот Куманово-Табановце, пет километри до границата со Србија. На површина од околу 60 хектари, зоната има 51 градежна парцела со различна големина, урбанистички е уредена за лесна и незагадувачка индустрија, трговски единици, сместувачки капацитети, сервиси и стоваришта.
По изградбата на зоната, домашните и странските инвеститори ќе можат да купат парцела со различни големини и со различни цени, почнувајќи од 61 до 800 денари за квадратен метар.
