По деветти пат викендов на „Алпинистичката карпа“ покрај кејот на Вардар во Карпош се одржа Балканското првенство за деца во качување на вештачка карпа – „Атомска мравка“. На меѓународната манифестација се натпреваруваа над 150 деца од седум различни држави.
Станува збор за олимписки спорт кој е во подем и во нашата земја. Потврда за тоа е и големиот број на учесници од нашата држава, кои покажаа одлична физичка и психичка подготвеност при искачувањето на карпата.
Инаку, во октомври на овој потег ќе започне изведбата на новиот спортско-адреналински парк, во чии рамки целосно ќе се реконструира скејт-паркот, ќе се санира и вештачката карпа, а просторот дополнително ќе биде збогатен со нови терени за фудбал и одбојка на песок, адреналински дел, детско игралиште, сквер и многу повеќе зеленило.
Овој дел ќе биде меѓу најатрактивните спортско-рекреативни зони во нашиот град.