Трамп: Нема да бидам диктатор ако се вратам на власт, освен првиот ден

60
EPA-EFE/JIM LO SCALZO

Поранешниот американски претседател Доналд Трамп изјави дека ако се врати на власт во 2025 година, нема да биде диктатор „освен првиот ден“.

Ова го изјави за „Фокс њуз“, на прашањето дали ќе се одмазди ако се врати во Овалната соба, пренесува „Политико“.

Како што објасни, тој ќе биде диктатор, пред сè во однос на затворањето на границата. „Освен тоа, јас не сум диктатор“, рече тој.

За време на кампањата, демократските кандидати често истакнуваат дека ако Трамп се врати на власт, тој ќе биде диктатор и дека ќе им се одмаздува на неистомислениците.

За време на интервјуто, Трамп го критикуваше американскиот специјален советник за климата Џон Кери за неговите изјави дека електраните на јаглен мора да се затворат.

„Кина гради една електрана на јаглен неделно, огромни електрани на јаглен и тоа го прават автоматски. А Џон Кери сака да престанеме да правиме сè што можеме. Имаме држава, мораме да ги активираме нашите фабрики. Ветерот нема да ги активира нашите фабрики“, рече Трамп, додавајќи дека Кери патува насекаде со приватен авион додека, како што рече, зборува за борбата против климатските промени.