Покрај барањето за зголемување на платите за 36 проценти и за зголемена сигурност на работното место, членовите на Синдикатот на „Џенерал моторс“, „Форд“ и на „Стелантис“ сакаат 32-часовна, односно четиридневна работна недела без намалување на платите
Минатата недела, кога обединетите работници од автомобилската индустрија организираа штрајк против „Џенерал моторс“, „Форд“ и „Стелантис“, едно од барањата се фокусираше на идејата што кружи меѓу синдикатите и нивните барања за трудова реформа.
Покрај барањето за зголемување на платите за 36 проценти и за зголемена сигурност на работното место, членовите на Синдикатот сакаат 32-часовна, односно четиридневна работна недела без намалување на платите, пишува Си-ен-ен.
Предлозите за скратување на работната недела се зајакнаа во последниве години, при што флексибилноста на далечинската работа од ерата на пандемијата поттикна многу од овие повици. Забрзаната употреба на вештачката интелигенција на работното место, исто така, натера некои работници да се сомневаат во неопходноста од 40-часовна недела.
Сенаторот Берни Сандерс долго време е гласен поборник за скратена работна недела.
– Гледаме експлозија во оваа земја на вештачка интелигенција и роботика. А, тоа значи дека просечниот работник ќе биде многу попродуктивен – изјави „Vermont Independent“ за Џејк Тапер на Си-ен-ен во неделата.
– Прашањето што треба да си го поставиме како нација е: Кој ќе има корист од оваа продуктивност? Треба да започнеме сериозна дискусија – и UAW го прави тоа – за значително намалување на работната недела.
Неколку земји спроведоа тестови за четиридневни работни седмици, од кои еден во Обединетото Кралство, минатата година. Истражувањето траеше шест месеци и опфати околу 2.900 работници во 61 компанија. Учесниците пријавиле подобар сон, повеќе време поминато со своите деца и пониско ниво на исцрпеност.
– Би било извонредно да се видат луѓето како поминуваат повеќе време со своите деца, со своите семејства, за да можат да имаат повеќе културни активности, да добијат подобро образование. Луѓето во Америка се под стрес поради десетина различни причини, и тоа е една од причините зошто очекуваниот животен век во нашата земја опаѓа – рече Сандерс.
Посебна студија спроведена на Исланд помеѓу 2015 и 2019 година покажа дека намалувањето на бројот на работните денови во неделата не ја намалува продуктивноста. Слична програма во САД и во Канада, составена од десетици бизниси, откри дека ниту една од компаниите не планира да се врати на петдневниот стандард по завршувањето на истражувањето.
