Можеби сме мали, но сме многу важни во овој дел од светот не само од аспект на струјата и прекуграничните трансакции. Треба да се земе предвид реалноста и да не се потцени овој мал, кревок пазар, порача мандатарот Христијан Мицкоски од седмиот Македонски енергетски форум (МЕФ).
Мицкоски напомена дека енергетската ефикасност ќе ѝ биде приоритет на идната Влада, но и дека завршувањето на грчко-македонскиот гасовод нема да ја комплетира сликата без дополнителни интерконектори кон централна и централно-источна Европа.
Според Мицкоски, паралелно со енергетската транзиција, земјава ќе мора да ги има предвид и социјалните аспекти, а ќе мора да се грижи и за загревањето, зашто и загадувањето треба да биде меѓу клучните приоритети.
– Можеби сме мали, меѓутоа сме важни кога станува збор за припојувањето со соседните земји и пазари, па често велам дека сме многу важен дел во однос на енергетската мрежа во овој дел од светот. Наш најголем приоритет во иднина ќе биде да го балансираме енергетското тргување, од една страна, зашто тековно сме земја што увезува и да креираме одржливи решенија, од друга страна, да го реорганизираме нашиот пазар на електрична енергија, па наместо да увезуваме, да извезуваме струја. Тоа ќе го избалансира нашето портфолио и ќе придонесе за раст на домашниот производ и за поддршка на економијата – рече мандатарот.
Пред него се обрати американската амбасадорка во земјава, Анџела Агелер, со порака дека енергетската сигурност и зелената енергија се два приоритета што треба да ги надминат партиските политики. Таа оцени дека земјава треба да го заврши грчко-македонскиот гасовод, кој ќе ги елиминира, како што рече, зависноста од Русија и заканите на одредени прекини во снабдувањето.
– Со интерконекторот, Северна Македонија ќе може да гради централи со погон на гас и да ја олесни транзицијата од јаглен кон други извори – потенцира Агелер, потсетувајќи дека земјава ја има поддршката од САД за спроведување на зелената транзиција.
На Форумот зборуваше и евроамбасадорот Дејвид Гир, кој уште еднаш ја искажа европската поддршка за реформите на земјава кон зелената транзиција.
Учесниците на Форумот ќе ги отворат прашањата за воспоставување енергетска сигурност и безбедност во регионот, за трансформација на енергетската инфраструктура, за еколошка одржливост, за примена на технологијата и иновациите, како и за финансирање на реформите кон зелена транзиција.
