Малта му ја прекина функцијата почесен конзул на Анѓушев

26

Министерството за надворешни работи на Малта му ја прекина функцијата почесен конзул на таа земја во Македонијa, на бизнисменот и поранешен вицепремиер, Кочо Анѓушев, откако беше обелоденето дека е ставен на најновата американска црна листа. Ова денеска го објави медиумот „Times of Malta“.

Анѓушев беше на чело на конзулатот на Малта во Скопје од октомври 2021 година по одобрение од владата на Малта.

„Со оглед на ваквите случувања, Министерството го прекинува неговото назначување со непосреден ефект и внимателно ги следи најновите случувања“, изјавил портпаролот на малтешкото министерство.

Како одговор на прашањата на малтешкиот медиум, портпаролот на тамошното Министерство за надворешни работи соопштил дека нивното МНР никогаш не добило никакви негативни информации за него од назначувањето во 2021 година.

Според соопштението објавено во вторникот од страна на американскиот Стејт Департмент, Анѓушев нема право на влез во САД откако, како што велат, ја злоупотребил својата службена положба додека бил вицепремиер во корист на неговите приватни деловни интереси, поткопувајќи ја довербата на јавноста во Северна Македонија во нашите владини институции и јавни процеси.

„Денешната акција покажува дека САД стојат со оние во Северна Македонија кои бараат одговорност од корумпирани јавни функционери“, се вели во соопштението на Стејт Департментот.

„Оваа ознака ја потврдува посветеноста на САД за борба против корупцијата, која му штети на јавниот интерес, го попречува економскиот просперитет на земјите и ја намалува способноста на владите ефективно да одговорат на потребите на својот народ“, се вели во соопштението.

Анѓушев беше вицепремиер задолжен за економски прашања од 2017 до 2020 година во Владата предводена од екс-премиерот Зоран Заев, кој тогаш беше лидер на СДСМ.

Анѓушев порача дека планира да поднесе жалба на одлуката и дека нема основа за ограничување на неговиот влез во САД.

Тој последен пат бил на Малта во април, каде што се сретнал со тамошниот министер за надворешни работи Јан Борг.