Претседателот на Франција Емануел Макрон денеска во Москва ќе се сретне со неговиот руски колега, Владимир Путин, во услови на силни тензии на руско-украинската граница, што за ЕУ претставува дел од нејзините напори за деескалација, јавува дописничката на МИА од Брисел.
И покрај низа критики од одредени страни во јавноста, францускиот претседател Макрон смета дека средбата со Путин е конструктивен чекор во обидот за дијалог со Русија.
Европската Комисија и високиот претставник за надворешна политика на ЕУ, Жозеп Борел, остануваат на ставот дека руското воено присуство на украинската граница е неоправдано, но не гледа проблем во средбата помеѓу Макрон и Путин.
-ЕУ е многу јасна и координирана бидејќи темата е дискутирана помеѓу 27-те земји членки, ова што се случува е непровоцирано и неоправдано, и постои потреба за ангажман со Русија за да се разберат причините за ова однесување, изјави денеска портпаролот за надворешни работи Петер Стано, одговарајќи на новинарско прашање за средбата Макрон-Путин.
Стано нагласи и дека Русија нема причина да се смета за загрозена.
-Нема причина за собирање на толкаво воено присуство на границата. Украина не претставува никаква закана, ниту пак ЕУ или западната заедница што било сториле за да пробудат чувство дека Русија е под закана како што тврди, изјави портпаролот.
