Наградата „Астер“ на 14. издание на Интернационалниот филмски фестивал „Астерфест“ за исклучителни достигнувања ќе му биде доделена на македонскиот филмски и телевизиски актер, Данчо Чеврески, а почесно признание ќе добие и документаристката Ким Лонгиното, на која плакетата ќе ѝ биде врачена во Велика Британија, соопштија од организацијата на манифестацијата.
Годинашното издание на „Астерфест“ ќе се одржи од 26 до 29 јули, во Амфитеатарот во Струмица, под мотото „Кратки резови“. За „Златната“, „Сребрената“ и „Бронзената потковица“, како и за „Старозлатниот проектор“ и за наградите „Ацо Алексов“ и „Ѓорги Абаџиев“ ќе се натпреваруваат 24 кусометражни филмови, меѓу кои: „Бродоломник“ на Сабрина Маренго, „Водата“ на Светислав Подлешанов и Кирил Каракаш, „Врне“ на Чиро Д’Емилио, „Двоен живот“ на Јоб, Јорис и Мариеке, „Доверба“ на Јулијана Нojхубер, „Егзодус 20“ на Јана Недзветскаја, „Еден мал чекор“ на Боби Понтилас и Ендру Чесворт, „Исповедта“ на Естебан Фонт Ројо, „Jа потпишав петицијата“ на Махди Флеифел, „Кожа“ на Гај Натив, „Кружно патување на монахот“ на Жарко Иванов…
Ќе има и специјални проекции на филмовите „Четирипати“ на Микеланџело Фрамартино, „Љубовта е сè“ на Ким Лонгиното и „Хај-фај“ на Владимир Блажевски, а ќе се одржи и традиционалната лауреатска беседа во Велјуса. „Астерфест“ е поддржан од Општина Струмица и од Агенцијата за филм.
