Шаховскиот Клуб „Алкалоид“, продолжува со настапите на Европскиот клупски куп, кој оваа година ќе се одржи од 10 до 16 ноември во Улцињ, Црна Гора.
Во 2016 година, „Алкалоид“ го освои Европскиот клупски куп и ја понесе титулата европски шампион со 12 бодови во седум мечеви (пет победи и два нерешени меча, без пораз). Европското клупско злато е освоено во годината кога клубот одбележа 40 години од своето формирање. Во 2017 година продолжи со успешен настап на Европскиот клупски куп и во Анталија, Турција, каде што го освои второто место, со 11 бода. Со идентичен скор во 2018 година (11 меч бодови), екипата се најде на делба од трето, а по дополнителен критериум шесто место во конечниот пласман.
Годинава клубот се подготвува за настап со изменет состав, без 4 играчи од претходна година. Но, оваа година во составот на екипата е еден од најсилните светски шахисти, велемајсторот од Азербејџан, Шакхријар Мамадијаров, кој настапуваше за „Алкалоид“ во 2007, 2008 и 2009 година. Боите на Алкалоид продолжуваат да ги бранат и стандардните членови велемајсторите Дмитри Андрејкин (Русија), кој ја предводеше репрезентацијата на Русија до злато на тукушто завршеното Европско Екипно Првенство, како и Јури Криворучко (Украина).
Прв пат за „Алкалоид“ ќе настапи шампионот на САД за 2018 година, велемајсторот Сем Шенкленд, стандарден репрезентативец на својата држава и носител на златен олимписки медал од 2018 година. Втор повратник во екипата е велемајсторот од Русија, Ернесто Инаркиев, Европски Првак од 2016 година.
Составот на екипата е комплетиран со двајцата најдобри македонски играчи: Трајко Недев и Филип Панчевски. Капитен на екипата е Драгољуб Јаќимовиќ. Со освежен состав, но воедно играчи кои биле дел од овој одличен спортски колектив, „Алкалоид“ ќе продолжи повторно да се бори за европскиот врв. Редоследот на играчите со конкретен распоред по табли официјално се објавува на самиот почеток на натпреварите.
На Европскиот клупски куп оваа година се пријавени досега најголем број учесници и тоа 67 екипи во машка и 14 во женска конкуренција.
