Клубот „Girl Up“ од Скопје, утре кај Школката во Градскиот парк ќе организира хуманитарен настан кој ќе започне од 11 до 16 часот.
-Во рамките на настанот ќе се организира еден вид на базар, каде посетителите ќе можат да купат рачно изработени торбички и други предмети од рачна изработка кои ни ги донираа неколку компании, но и икони изработени од децата од посебното основно училиште „Иднина“ – изјави седумнаесетгодишната Јана Ацовска, лидер и основач на клубот „Girl Up“ од Скопје .
Освен тоа, ќе има и детско катче каде децата ќе можат да купат маички и да цртаат на нив, а ќе има и многу музика. Ќе настапат познати македонски имиња, меѓу кои Александар Тарабунов, Лина Пејовска, Огнен Здравковски и други.
Средствата од продажбата на рачните изработки, иконите, маичките итн. ќе бидат наменети за децата од посебното основно училиште „Иднина“.
-Сакаме да им купиме смарт табла на овие деца, бидејќи навистина им е потребна. Со собраните средства ќе можеме да го реализираме тоа. Ова беше предлог на девојчињата од нашиот клуб – нагласи Ацовска.
Овој клуб е основан пред два месеци, а ова е првиот хуманитарен настан што го организира иако е малку надвор од нивната вистинска цел, а тоа е еднакво здравје и едукација на девојчињата. Во него членуваат 20 девојчиња, на возраст од 16 до 20 години.
Наредно што овој клуб ќе го прави е натпревар во изработка на проекти во врска со актуелни проблеми на НАСА, како што е глобалното затоплување.
-Тие ќе прават веб страници, апликации итн. Жири-комисија од истакнати информатичари ќе ги оценуваат проектите, а трите најдобри ќе бидат испратени во НАСА. Изборот ќе се прави во средината на декември, а најдобрите проекти во НАСА ќе бидат испратени во јануари или февруари. Тоа ќе им овозможи на девојчињата стипендии и ќе можат да го продолжат школувањето – информираше Ацовска.
Седиштето на организација „Girl Up“ е во Вашингтон и е поддршана од фондацијата на Обединетите Нации. Оваа организација има 3.300 клубови во 120 земји.
(А.П.)
