Случајот „Парцели во Лисиче“ останува во фокусот на интересот на граѓаните во Аеродром. Поминаа точно 10 дена откако заврши јавната анкета преку која граѓаните му порачаа на Тимчо Муцунски дека се против изградбата на 9 висококатници на влезот на населбата Лисиче.
Од СДСМ велат дека наместо гаранција дека ќе ги избрише спорните градежни маркици, граѓаните слушаат лажни конструкции и лажни ветувања од градоначалникот на општина Аеродром, Тимчо Муцунски.
– Наместо да ги преземат сите потребни чекори за бришење на маркиците и на тој начин да ја спречат бетонизацијата на Лисиче, Муцунски и ВМРО-ДПМНЕ држат изјави полни со изговори. Нови 9 висококатници на влезот од Лисиче, за граѓаните недвосмислено ќе значат намален проток на воздух, зголемен сообраќаен метеж, хаос од непрописно паркирани возила и преоптоварени капацитети на водоводната и канализационата мрежа – велат од СДСМ.
Оттаму нагласуваат дека Муцунски им должи одговори на граѓаните:
1. Дали е точно дека највисоката од вкупно 9 висококатници во Лисиче, предвидено е да има 12 ката, односно приземје, 10 ката и поткровје?
2. Дали е точно дека најмалку 3 висококатници предвидено е да бидат на 8 ката, односно приземје, 6 ката и поткровје?
3. Дали е точно дека 4 висококатници се предвидени да бидат подигнати над главна гасоводна цевка со пречник Фи-400 која ги поврзува индустриските капацитети во Железара и Усје?
4. Зошто сопственици на позната градежна компанија лани купиле ниви со површина од над 1000 метри квадратни на местото каде што ја предвидувате највисоката висококатница?
– Го повикуваме градоначалникот Муцунски наместо да се занимава со продукција на лажни вести, да даде одговори на овие прашања кои граѓаните секојдневно му ги поставуваат. Уште еднаш ја повикуваме и Државната антикорупциска комисија, да отвори предмет и во целост да го расчисти случајот „Парцели во Лисиче“ – велат од СДСМ.
