Комплетно ќе бидат уредени две спортски игралишта што се во полоша состојба, сензорните соби во основните училишта ќе бидат опремени со реквизити за спорт за развој, а дополнително ќе се едукацираат 25 тренери – наставници.
Ова се дел од активностите во рамки на проектот „Спорт за сите“, за кој денеска Општина Карпош потпиша Меморандум за партнерство со здружението за унапредување на меѓународна соработка „ТАКТ“ и Германското друштво за меѓународна соработка – ГИЗ.
Како што соопшти Општина Карпош, грантот за овој проект изнесува 27.000 евра, а пред неколку месеци се спроведе викенд обука на претставниците од општинската администрација, заедно со претставниците од „ТАКТ“ и ГИЗ, каде имаа можност да ги разменат очекувањата и целите од оваа соработка.
Градоначалникот Стефан Богоев се заблагодари на невладината организација, која, како што се наведува, ја одбра токму Општина Карпош за соработка.
– Локалната самоуправа значително инвестира во спортскиот развој на граѓаните. Во овие моменти, тоа најдобро се гледа и преку изведба на новиот спортско – рекреативен центар во Карпош 3, во дворот на ООУ „Лазо Трповски“. Тука, карпошани ќе добијат простор за играње на кошарка, ракомет, мал фудбал и сервис – стои во соопштението.
Магдалена Спасовска и Надица Јовановиќ од „ТАКТ“ се заблагодарија за успешниот почеток на соработката и изразија надеж дека Карпош ќе биде општина – пример за спорт за развој.