Јужнокорејската влада на осамените млади ќе им плаќа 500 долари месечно за социјализација во општеството.
Корејската влада призна дека дел од младите во нивната земја се чини дека се целосно отсечени од светот и сега е подготвена да им плати за „повторно да влезат во општеството“
Министерството за родова еднаквост и семејни прашања минатата недела објави дека ќе обезбедува до 650.000 корејски вони (околу 500 долари) месечно за изолираните социјални осаменици, што значи младите луѓе кои се осамени, во обид да ја поддржат нивната „психолошка и емоционална стабилност и здрав раст“.
Околу 3,1% од Корејците на возраст од 19 до 39 години се „повлечени осамени млади луѓе“, кои се дефинирани дека живеат во „ограничен простор, неспособни да се поврзат со надворешноста повеќе од одреден временски период и имаат забележителни тешкотии во нормалниот живот“, се вели во извештајот на Министерството, повикувајќи се на Корејскиот институт за здравство и социјални работи.
Тоа се околу 338.000 луѓе низ целата земја, од кои 40% ја започнуваат својата изолација во адолесценцијата, според Министерството. Се смета дека се во игра различни фактори, вклучувајќи финансиски тешкотии, ментална болест, семејни проблеми или здравствени проблеми.
Новите мерки се конкретно насочени кон младите како дел од поголемиот Закон за поддршка на благосостојбата на младите, кој има за цел да ги поддржи луѓето кои се екстремно повлечени од општеството, како и младите луѓе без старатели или училишна заштита кои се изложени на ризик од деликвенција.
Месечниот надоместок ќе биде достапен за осамени млади луѓе на возраст од 19 до 24 години кои живеат во домаќинство кое заработува под националниот просечен приход – дефиниран во Јужна Кореја како околу 5,4 милиони вони (околу 4.165 долари) месечно за четиричлено домаќинство. Младите можат да аплицираат за програмата во локалниот административен центар за социјална работа; Во нивно име можат да аплицираат и нивните старатели, советници или наставници.
„Повлечените млади може да имаат побавен физички раст поради нередовниот живот и неурамнотежената исхрана и веројатно ќе се соочат со ментални тешкотии како депресија поради губење на социјалните улоги и одложена адаптација“, рече Министерството, нагласувајќи ја важноста од „активна поддршка “, како што објави Си-Ен-Ен.
Некои градови и локални самоуправи веќе имаат слични системи; Сеул, главниот град на земјата, има „Проект за поддршка на младите во изолација“ кој обезбедува советување за ментално здравје, развој на хоби и обука за работа, како и животен тренинг за изолираните млади луѓе.
Овој феномен не е единствен само за Јужна Кореја. Јапонија има сличен проблем, со речиси 1,5 милиони повлечени осамени млади луѓе, познати како hikikomori, според неодамнешното владино истражување. Некои излегуваат само за да купат намирници или за секојдневни активности, додека други не ја напуштаат ни спалната соба.
