Во периодот на велигденски десерти, традиционални милиброди, разни слатки лебови, земички со крст, и други традиционални празнични слатки кои се послужуваат на велигденската трпеза во земјите кои што го одбележуваат христијанскиот празник, пробајте еден малку поинаков, а сепак близок до вкусот и состојките -сочнен десерт со вкус на портокал.
Направете го во класичен калап за куглов и вашето попладневно кафепиење ќе добие празничен шмек.
Состојки:
- 4 јајца
- 260 гр шеќер
- 2 ванилин шеќери
- 1,6 дл масло
- 1,5 дл цеден сок од портокал
- кора од еден лимон (органски)
- малку рум
- 1 прашок за пециво
- 330 гр меко брашно
Подготовка:
Се матат јајцата, шеќерот и ванилиниот шеќер, па се додаваат маслото и сокот од цеден портокал. Ако имате органски лимони, додадете кора од лимон (од еден лимон)
Потоа додадете малку рум, а на крајот измешајте го брашното измешано со прашокот за печиво.
Смесата истурете ја во намрсен и набрашнет калап за куглоф. Печете на 180 степени 45 до 55 минути додека убаво не поруменат и лесно се одвојат од страните на калапот.
Послужете го куглофот посипан со шеќер во прав, а по желба можете да го премачкате со чоколадна глазура од бело или темно чоколадо.