Германија и Канада се меѓу најголемите економии кои се најранливи на ефектите од пандемијата поради нивната трговска зависност, се вели во новиот извештај на аналитичарите на ИНГ, пренесува Блумберг.
Брзото ширење на „Ковид-19“ во Соединетите држави и економската штета ќе се покаже како „значаен проблем“ за Канада. Увозот од Соединетите држави во 2019 година на стоки, како што се автомобили, опрема и нафта, изнесува 453 милијарди долари, според Меѓународниот трговски центар.
Меѓу најголемите извозници, Германија е особено ранлива поради нејзината зависност од странската побарувачка за опрема, автомобили и лекови, се наведува во извештајот.
„Отворените економии ќе страдаат повеќе од шокот и на побарувачката и на понудата“, се вели во извештајот. „Дури и откако вирусот ќе биде ставен под контрола на локално ниво, отворената економија ќе продолжи да претрпува штета поради намалената побарувачка во земјите кои сè уште се справуваат со кризата“. Ова е ситуацијата во Кина во моментот: земјата во голема мерка успеа да се справи со епидемијата, но проблемите во САД и Европа значат намалување на нарачките.
Земјите како што се САД, Индија и Бразил, чиј извоз е релативно мал во однос на нивната вкупна економија, ќе претрпат помалку од оние што зависат од побарувачката за прекуокеанија – како Ирска, Унгарија, Сингапур и Виетнам.
Во извештајот се истакнува дека затворените економии не мора да имаат подобри резултати во услови на криза – зависи од тоа колку производниот капацитет ќе претрпе.
