Бројот на починати од коронавирус во светот би можел да достигне два милиони пред да почне употребата на делотворна вакцина, предупредил директорот на програмата на СЗО за вонредни ситуации, Мајк Рајан. Тој смета дека тој број би можел да биде и поголем ако не се усогласат акциите за сузбивање на пандемијата, пренесе Ројтерс.
“Ако не направиме се што можеме, бројот од два милиони жртви не е само проценка, туку и многу веројатен”, рекол Рајан на брифинг во петок.
Во светот се регистрирани речиси милион смртни случаи, речиси девет месеци откако коронавирусот е откриен во Кина, а Рајан рекол дека не треба да се обвинуваат младите за неодамнешниот пораст на бројот на заразени, и покрај се поголемата загриженост дека токму тие го поттикнуваат неговото ширење по ублажувањето на мерките и карантинот во светот.
