Најмалку четири лица се повредени, меѓу кои и свештеник, во напад со нож за време на богослужба во црква во предградие на Сиднеј во понеделникот, соопшти полицијата. Како што пренесуваат медиумите, нападот предизвикал судири меѓу гневните жители и полицијата.
Полицијата соопшти дека уапсила 15-годишно момче на местото на настанот и биле принудени да го приведат во црква во Вејкли, предградие на околу 30 километри западно од центарот на Сиднеј, поради негова безбедност, откако толпата се собрала надвор барајќи напаѓачот да биде изведен.
„Да не го навредеше мојот пророк…“
Епископот Мари Емануел од црквата „Христос Добриот Пастир“ зборувал за време на вечерната богослужба во понеделникот кога му пришол маж држејќи нож, како што се гледа на видео снимката од настанот.
Преплашените верници врескаат додека мажот го прободува свештеникот неколку пати во главата и градите, покажуваат снимките. На посебна видео снимка од очевидци, потврдена од Ројтерс, која е снимена по инцидентот, се гледаат уште неколку луѓе како лежат на земја.
„Да не го навредуваа мојот пророк, немаше да дојдам овде“, се слуша глас на арапски како вели на видеото.
Властите не го открија мотивот за нападот и не го идентификуваа осомничениот.
„Имаше толку многу гнев…“
Двајца сведоци за „Ројтерс“ изјавија дека толпата фрлала со камења кон полицијата. Повеќе од 100 полицајци на крајот беа повикани да се справат со немирите, а двајца беа пренесени во болница со повреди, соопшти полицијата. „Ројтерс“ видел двајца мажи кои биле испрскани со солзавец.
„Беа толку лути затоа што го сакаат бискупот, а го сакам и јас. Тој проповеда за Господ, а ние го сакаме Господ“, изјави една мештанка.
Сторителот е пренесен на непозната локација.
Тоа беше втор голем напад со нож за само три дена, откако шест лица беа убиени во напад во трговски центар покрај плажа во областа Бондај.
