Денеска ќе бидат познати уште два тима кои ќе бидат дел од 1/8 финалната рунда во најпрестижното клупско натпреварување, Лигата на шампиони. Голема борба до последниот судиски свиреж се очекува само во групата „Д“ каде што сите четири тима имаат шанса да обезбедат пласман во следната елиминациска рунда. Лондонскиот премиерлигаш Тотенхем ќе се пласира во 1/8 финалето доколку остане непоразен на жешкото гостување на „Велодром“, додека домаќинот, Олимпик од Марсеј, нема друга опција на располагање освен да слави во последниот натпревар од групната фаза.
- Работевме напорно изминатите неколку дена, но добро знаеме дека дуелот против Тотенхем не смее да ни влезе во главата. Мислам дека пресметката против англискиот клуб ќе биде натпревар на годината за Марсеј. Знам дека навивачите ќе уживаат, а ако се анализира нашата игра на претходните натпревари, ќе дојдеме до заклучок дека заслужуваме пласман во 1/8 финалето. Доволно сме добри, храбри сме и мора да бидеме горди на самите себеси. Јас сум горд на моите фудбалери, изјави предводникот на Марсеј, Игор Тудор.
Голема неизвесност се очекува и во Лисабон каде што домаќинот, тимот на Спортинг, има потреба од најмалку еден бод во дуелот против германскиот бундеслигаш Ајнтрахт, кој пак само со победа и математички ќе обезбеди пласман во 1/8 финалната рунда.
Во групата „А“ се познати патниците во следната рунда, но големо внимание сигурно ќе привлече пресметката на „Енфилд“ помеѓу совршениот Наполи и англискиот премиерлигаш Ливерпул. Италијанскиот калчолигаш славеше на претходните пет натпревари од групната фаза, а првата меѓусебна пресметка заврши со убедлив триумф на „азурите“ од 4:1. Според фудбалските медиуми од Апенинскиот полуостров, репрезентативецот на Македонија, Елиф Елмас, сигурно ќе добие шанса да биде дел од почетниот состав на Наполи.
Денеска на програмата: ГРУПА А: Ливерпул – Наполи, Ренџерс – Ајакс. Табела: Наполи 15, Ливерпул 12, Ајакс 3, Ренџерс 0 бодови. ГРУПА Б: Леверкузен – Бриж, Порто – Атлетико (М). Табела: Бриж 10, Порто 9, Атлетико (М) 5, Леверкузен 4 бода. ГРУПА Ц: Баерн (М) – Интер, Викторија П. – Барселона. Табела: Баерн (М) 15, Интер 10, Барселона 4, Викторија П. 0 бодови. ГРУПА Д: Марсеј – Тотенхем, Спортинг Л. – Ајнтрахт. Табела: Тотенхем 8, Спортинг Л. 7, Ајнтрахт 7, Марсеј 6 бода.
