Претседателот на Србија, Александар Вучиќ, во последно време често ги споменува новооткриените наоѓалишта на злато. Сценариото е секогаш исто, Вучиќ со драматичен тон му соопштува на народот дека е пронајден рудник за злато кој треба да реши многу проблеми. Во понеделникот Вучиќ зборуваше за наоѓалиштето на злато во своето едночасовно обраќање до српската јавност, во кое пред се зборуваше за ситуацијата со Косово и планот за Косово што Вашингтон и Брисел го поставија пред Белград, пишува Индекс.хр.
Вучиќ на крајот од прес-конференцијата се сврте, како што самиот рече, на добрите вести. Тој рече дека во Србија е пронајдено уште едно наоѓалиште на злато и тоа е поголемо од првото.
„Конечно, имам добра вест за сите луѓе. Објавивте дека во Жагубица се пронајдени 500 тони злато. Најдовме друго место во Србија со многу повеќе злато отколку во Жагубица. Ана (свртувајќи се кон Ана Брнабиќ), да не го кажувам точното место се уште? Сите ќе отидат таму! Добро, ние двајца знаеме каде е тоа место, па не се обидувајте да дознаете додека не дојдеме да ја завршиме работата. Според првите прелиминарни извештаи, се работи за наоѓалиште кое е меѓу првите 100 во целиот свет, а можеби и подобро од тоа“, изјави Вучиќ.
Геологот Бранислав Божовиќ за Нова.рс истакна дека наоѓалиштето би можело да биде исклучиво во областа на Хомољските планини, каде што се откриени појави на злато уште во 19 век.
Своето тврдење Божовиќ го образложи со тоа што уште од 19 век е познато дека во Хомољските планини има рудна маса во која меѓу другото има и злато, како и дека геолошките истражувачи за време на Кралството Југославија како во повоениот период за време на СФРЈ, дошло до такви потврди.
„Областа на Хомољски планини е убедливо наша најголема површина на наоѓалишта на злато и нема спорно дека злато е пронајдено на кое било друго место. Кога претседателот вели дека е пронајдено ново наоѓалиште и е таинствено, граѓаните може да мислат дека е во близина на некој град, на пример, Белград или Шабац. Не, тоа може да биде само во Хомоље“, подвлече геологот Божовиќ.
И во декември Вучиќ зборуваше за наоѓалиште на злато
И во средината на декември Вучиќ изјави дека во една сиромашна општина на југоистокот од земјата е пронајдено големо наоѓалиште на злато. Јавните шпекулации продолжија каде се наоѓа, а минатата недела компанијата Dundee Precious Metals Inc. (DPM) во официјалното соопштение наведува дека во близина на проектот „Тимок Голд“, на локацијата Чока Ракита, во општина Жагубица се пронајдени злато и бакар. Компанијата објавила дека се работи за висококвалитетни примероци.
Чока Ракита се наоѓа на три километри југоисточно од проектот Тимок Голд, а на длабочина од 517 метри пронајдени се 63,46 грама на тон злато и 0,11 отсто бакар, се вели во соопштението.
Божовиќ изјави дека Жагубица, како локација која претседателот Вучиќ веќе ја спомена како едно од наоѓалиштата на злато, се наоѓа токму во планините Хомоље и дека новата локација, дури и ако е оддалечена 100 километри од Жагубица, „не е ново наоѓалиште, туку дел од истота рудна маса лоцирана под планинскиот комплекс“.
Тој потсети дека може да поминат децении до „новото откритие на злато“, велејќи дека некои рудници никогаш не биле отворени иако биле пронајдени одредени руди.
„Изјавите на претседателот и неговите ветувања до народот дека стануваме се побогати и дека секој ден се открива ново богатство се, благо речено, дилетантски. Тоа не е богатство засега и веднаш. Ако современите методи на истражување покажат дека постојат големи наоѓалишта на златна руда, можеби ќе бидат потребни децении за да се отвори рудник, вели Божовиќ.
Индекс.хр ја анализира приказната и од политички агол, за што разговараше со претседателката на Хелсиншкиот комитет за човекови права во Србија, Соња Бисерко.
„И во времето на Милошевиќ, по интервенцијата на НАТО, кога финансиската состојба беше многу лоша, имаше приказни за злато. Тогаш дигнаа едно брдо во воздух затоа што според легендата таму било закопано богатството. За тоа се дозна од весниците, односно од луѓето кои имаа викендички таму.
Сега, 20 години подоцна, тој повторно зборува за злато. Некогаш се спомнуваше за кралското злато, па легендата за ридот, сега имаме нови локалитети, за кои, добро, знаат само претседателот Вучиќ и уште еден човек. Очигледно, тоа е приказна која се лансира во критични времиња, кога има некаков економски или надворешен притисок. Оваа практика е вообичаена во Србија“, вели Бисерко.
Таа вели дека и е тешко да каже какви се реакциите на мнозинството граѓани, но додаде и дека 30 години им е испран мозок, па можно е некои да им поверувале на приказните за наоѓалишта на злато кои ќе го променат животот на српското население.
