Како гром од ведро небо одека информацијата за новите проблеми на лондонскиот премиерлигаш Челзи и сето тоа поради двата трансфери кои се случија во ерата на милијардерот Роман Абрамович.
Како што пренесуваат англиските медиуми, покрената е истрага поради тајните плаќања од тогашното раководство на лондонските „сини“. Истите медиуми веднаш открија за кои трансфери станува збор.
Имено, под лупа се исплатените парични суми за трансферите на Самуел Ето и Вилијан. Во прв план се чудни плаќања кои се направени со рускиот клуб Анжи за кого играа Ето и Вилијан.
Англиските медиуми тврдат дека се случиле некои дополнителни плаќања кои не се дел од трансферот, но се наведени како дел од трансферот.
Анжи го донесе Вилијан за 30 милиони евра од Шахтјор во јануари 2013 година и за истата сума го продаде на Челзи осум месеци подоцна.Од друга страна, неколку дена подоцна, Ето се пресели во Челзи како слободен играч.
Се наведува и дека ниту еден од играчите наводно не бил свесен за ништо кога станува збор за наводните сомнителни уплати. Сите исплати направени од Челзи помеѓу 2012 и 2019 година сега се под истрага.
Според англиските медиуми, наводно постои тајна сметка на која се уплаќале огромни суми на пари од Челзи. Како и зошто луѓето од Челзи го правеле тоа , секако доколку се утврди дека е вистина, ќе треба да објаснат пред истражните органи во Англија но и пред УЕФА и ФИФА.
