Пилотот на Ферари, Германецот Себастијан Фетел, во иднина ќе биде жртва на новата генерација во Формула 1, предводена од неговиот тимски колега Шарл Леклер. Ова е мислењето на познатиот холандски рели шампион и Формула 1 коментатор, Том Коронел. Тој се сомнева дека четирикратниот светски шампион ќе успее да се рехабилитира по загубената титула минатата година.
Минатата сезона Ферари за првпат го достигна нивото на Мерцедес и во првиот дел од шампионатот болидот беше дури и побрз. Само тимските грешки, но и на Фетел, беа причина Скудериа повторно да се “сопне#, а Британецот Луис Хамилтон тоа знаеше да го искористи на најдобар начин, на кој ја одбрани титулата во најбрзиот циркус на денешницата.
Според Коронел, нервозата кај Фетел продолжува да расте, а во новата сезона ќе му недостасува и поддршката од Кими Раиконен, кој оваа сезона ќе вози за тимот на Заубер.
– Започнува период во кој доаѓа една нова генерација. Фетел повторно загуби во шампионатот и едноставно е скршен поради тоа. Сигурен сум дека тој нема да успее да го надмине ова, а се надевам дека Ферари на двајцата пилоти ќе им даде еднакви услови за тркање. Она што Леклер го покажа во текот на минатата сезона беше апсолутна класа, дури и редовно освојуваше бодови. Се разбира, Заубер користеше мотори на Ферари, а Шарл знаеше да ја искористи оваа предност, истакна Коронел.
Новата сезона во Формула 1 започнува на 17 март со трката за Големата награда на Австралија.
