Градскиот инспекторат во соработка со МВР, како и јавните претпријатија „Комунална хигиена“ и „Улици и патишта“ спроведуваат голема акција за расчистување на дивата депонија на улицата „Александар Урдаревски“ во општина Бутел.
Како што информираат градските власти, оваа дива депонија беше лоцирана при вонреден инспекциски извршен на 26.07.2019 година. На лице место беше констатирано незаконско депонирање на комунален отпад, градежен шут и земја. За оваа дива депонија за првпат во историјата на Град Скопје е поднесена кривична пријава за неовластено фрлање смет врз основа на Кривичниот законик.
Акцијата на расчистување на дивата депонија и враќање на теренот во првобитна состојба почна бидејќи не се пристапи со извршување на издаденото решение и рокот за расчистување од градскиот инспекторат, а лицето против кое е поднесена кривична пријава ќе ги сноси трошоците за расчистувањето на дивата депонија.
Засилените контроли на градскиот инспекторат ќе продолжат и во наредниот период со цел спречување на несовесно постапување со отпадот и создавање на диви депонии кои ја загрозуваат животната средина.
