Претседателот на Србија, Александар Вучиќ, за утре свика состанок на Советот за национална безбедност во врска со вечерашниот терористички напад во Москва.
Вучиќ за девет часот закажа седница на Советот за национална безбедност.
Тој најави дека српските безбедносни служби ќе ја интензивираат работата и дека е неопходно да се заштитат граѓаните.
„Важно е сите да преземеме мерки, нашата БИА да биде подготвена, да ја зајакнеме работата на нашите служби, особено да ги обезбедуваме стадионите и трговските центри“, изјави Вучиќ за ТВ Прва.
Тој рече дека има повеќе причини поради кои седницата на Советот за национална безбедност е свикана за утре и тоа е непосредна причина.
„Важно е да ги преземеме сите неопходни мерки, никогаш не можете да бидете целосно сигурни кога нешто може да се случи“, рече Вучиќ.
„Малкумина сакаа да слушнат и да поверуваат, погледнете ги фактите. На 7 март Американската амбасада ги повика граѓаните да не одат во трговските центри. Нивните специјални служби пресретнаа и добија одредени информации и знаеја што се случува. Некој ќе каже дека е Киев, Киев ќе каже дека тоа е Москва“, рече тој.
Тој додаде дека нема сомнеж дека конфликтот во Украина ќе продолжи да ескалира.
„За моја жал, бев во право. Верувам дека секој ден сме се поблиску до голем светски конфликт, најголем во историјата и се плашам дека ќе одземе повеќе животи од Втората светска војна“, рече Вучиќ.
Тој исто така изјави дека покрај „брзите мерки за апсолутна безбедносна заштита на Србија, ќе предложи и некои нови закони“.
Тој најави дека значително ќе се зголемат казните за сите кои ќе бидат фатени со ладно оружје.
Најмалку 40 лица загинаа, а повеќе од 100 се ранети во терористичкиот напад што се случи вечерва во концертна сала во Москва.
