Откако директорката на едно училиште во Флорида поднесе оставка бидејќи учениците имаа можност да видат слика од „гола“ статуа на час, сега проблемот избувна и во Шкотска.
Италијанскиот ресторан „Бароло“ направил реклама на која се гледа како Давид јаде пица, но компанијата која се грижи за рекламниот простор во градското метро одбила да ја изложи.
Од ресторанот „Бароло“ велат дека му понудиле да го сокријат меѓуножјето на Давид со налепница со италијанско знаме, но и тоа било одбиено, бидејќи налепниците не биле доволно големи. Тие сепак се согласија дека само горниот дел од статуата, од половината нагоре, треба да биде видлив.
Од тоа решение не е задоволен Марио Гизи, директор на ДРГ групацијата, во чија сопственост е „Бароло“ и многу други ресторани.
„Ова е светски познато уметничко дело. Се учи на училиште. Луѓето патуваат од целиот свет за да го видат. Ова веќе не е 16 век – ова е 2023 година. Дали навистина велиме дека луѓето не можат да поднесат да гледаат гола статуа?“, рече Гизи.
Тој додаде дека сите во компанијата се забавувале со мејлот што го добиле од компанијата што го издава рекламниот простор.
„Тие потврдија дека нашата реклама не може да се користи бидејќи е „уметност, но сепак голотија“. Ние моравме да ги сносиме трошоците за препечатување“, истакна режисерот.
Еуроњуз пишува дека според Агенцијата за стандарди за рекламирање, не постои конкретно правило за забрана на голотија, но на сопствениците на медиумите им е дозволено да одбијат да отстапат рекламен простор.
„Тие често имаат свои критериуми, заедно со Кодексот за рекламирање, кога станува збор за тоа што ќе прифатат и што нема. Ова е комерцијална одлука, а не нешто што можеме да го регулираме. Ние одговараме на поплаките за содржината кога ќе стане јавно достапна “, велат од Агенцијата.
Додаваат и дека според кодексот не е забрането да има голотија во рекламите, доколку таа не е експлицитна или прекумерна и ако е релевантна за производот. Меѓутоа, голотијата која е „од сексуална природа“, додаваат тие, треба да се појавува само во таргетирани медиуми.
