Доколку имаше Олимпијада за пасоши, Јапонија не само што ќе беше домаќин, туку и ќе победи на тоа натпреварување, пишува CNN, пренесувајќи го извештајот на „Хенли“ за пасоши, кој рангира патнички документи на 199 земји од 2006 година.
Со јапонскиот пасош, без виза може да се патува во 193 земји. На оваа листа, македонскиот пасош е на 46. место и со него не е потребна виза за влез во 126 земји во светот.
Според истражувачите од компанијата „Хенли и партнерите“, во првиот квартал од 2021 година, меѓународната мобилност сè уште била само 12 проценти пред пандемијата, што значи дека „јазот помеѓу теоретскиот и реалниот пристап за патување што го нудат дури и добри пасоши е сè уште значителен“.
Кристијан Х. Каелин, претседател на компанијата, вели дека иако не знаеме колку ќе траат ограничувањата за патување, јасно е дека глобалната мобилност ќе биде попречена барем во остатокот од оваа година.
Тој забележува дека нееднаквоста особено расте во такви околности. Така, сопствениците на јапонски пасоши можат да посетат околу 167 дестинации повеќе отколку граѓаните на Авганистан, кои имаат пристап до само 26 дестинации во светот. Ова е најголемиот јаз откако Хенли мери за потребите на својата анализа.
Кој е во топ 10?
Најдобрите 10 пасоши остануваат практично непроменети бидејќи влегуваме во втората половина на годината.
Јапонија е повторно на врвот на листата. Пасошот на оваа азиска земја ги отвора вратите на 193 земји во светот. Всушност, така е на хартија. Во реалниот свет, каде владеат мерките за корона, тие што имаат јапонски пасоши во моментов имаат пристап до помалку од 80 проценти од светските дестинации.
Сингапур останува на второто место со можност за влез во 192 земји, по што следи Јужна Кореја, која го дели третото место со Германија со можност за влез во 191 земја.
Финска, Италија, Луксембург, Шпанија се на четвртото место, Австрија и Данска се на петтото место, додека Франција, Ирска, Холандија, Португалија и Шведска се на шестото место.
САД и Велика Британија се на седмото место, заедно со Швајцарија, Белгија и Нов Зеланд. Моќта на пасошите во САД и Велика Британија постепено опаѓа од 2014 година. Во теорија, сопствениците на пасоши во САД и Велика Британија можат да одат до 187 дестинации, но во реалноста имаат пристап до околу 60, односно 61 дестинација,
Чешка, Грција, Малта и Норвешка се на осмото место, Австралија и Канада се на деветтото место, а Унгарија на десеттото место.
Како е рангиран регионот?
Од земјите во регионот најдобро рангирана е Грција (8. место) со чиј пасош не се потребни визи за 186 држави. Во шест држави помалку може да се влезе со пасош од Словенија, која е рангирана на 12. место. Бугарскиот пасош се наоѓа на 16. место и со него нема потреба за виза во 174 земји.
Едно позиција подолу на овој индекс се наоѓа Хрватска чии граѓани може да патуваат без визи во 173 држави.
Од нас, подобро рангирана е и Србија, која е на 38. место – не се потребни визи за 136 земји.
Едно место по Северна Македонија е Црна Гора (43.) чиј граѓани без визи може да патуваат во 124 земји или две помалку од нас.
Подолу на листата се Босна и Херцеговина (53. место – 117 држави), Албанија (55. место – 115 држави) и Косово (107. место – 40 држави).
Кои пасоши се најлошо пласирани?
Што се однесува до дното, најлоши позиции зазедоа земјите, со чии пасоши се дозволува безвизен влез во помалку од 40 земји во светот. Тоа се: Северна Кореја, Непал, палестинските територии, Сомалија, Јемен, Пакистан, Сирија, Ирак и Авганистан.
