Во рамките на втората фестивалска вечер на „Крај Вардарот џез“, на 23 април, во Македонската филхармонија со почеток во 20 часот, на пијано ќе настапи Дуња Иванова. Нејзиниот концертен настап на „Мирисот на липите“ ќе биде проследен со текст и нарација на Тина Иванова. Овој музичко-поетски проект раскажува приказна за познатите урбани и скриени места на Општина Центар: липите на улицата „Орце Николов“, панкот од гаражите на „Плочник“, дружбите во дворот на „Песталоци“, графитите на кејот, паркот на Горан Стефановски, кафеаната „Наџак“… Ќе бидат изведени композицијата „Свита за Скопје“ од македонската композиторка Ана Пандевска и песната „Ние сме од Скопје“ на Мирко Попов, чиј аранжман за пијано го направи Пандевска. Полчасовно патување низ симболите на Скопје, погледнати низ интимна, лична перспектива на авторите. Во музиката, како и во нарацијата, провејува нишка на носталгија, а во исто време и крик за подобро утре на градот во кој пораснавме и без чиј воздух не можеме да живееме. „Мирисот на липите“ симболично ќе прикаже, преку звук и говор, еден живот на жител од Центар. Поетскиот наратив е оригинално креиран за овој уметнички перформанс, кој промовира иновативен пристап со содржина што, пак, претставува „жива“ материја, блиска до човечкото срце. Минатиот месец, за „ПМГ џез“, како 44. издание, излезе албум во живо, концерт на пијано на Дуња Иванова, кој беше реализиран во рамките на музичката програма „Крај Вардарот сесии во аудиокултура“, која изведе композиции од Ана Пандевска.
Веднаш потоа, во 21 часот, на таа сцена ќе започне долгоочекуваниот концерт на Биг бендот, со музика од Кире Костов. Концерт посветен на еден од стожерите на современата џез-композиција, Кире Костов, преку интерпретација на негови избрани дела во современ аранжман, од страна на Биг бендот, под диригентската палка на Љупчо Мирковски. Костов е едно од најзначајните имиња во современата џез-музика, чија работа опфаќа бројни ангажмани и дела, меѓу кои: солист и диригент на Танцовиот оркестар на РТВ Скопје, наградуван трубач во Југославија, претставник во Биг бендот на Европската радиодифузија, автор на педесетина композиции во оркестарска изведба од областа на џезот, 300 песни во популарната музика и реализатор на сите изданија на Скопскиот фестивал од 1991 година. Подеднакво значајна ќе биде и изведбата на селектираните дела од Костов на една од нашите најзначајни оркестарски формации, чија историја датира од далечната 1961 година (Биг бендот на МРТ), кој во 2013 година се возобнови и продолжи да работи во музичка формација водена од Љупчо Мирковски како диригент.
Фестивалот „Крај Вардарот цез“ ќе биде заокружен на 27 април, во едукативно-културниот центар „Лабораториум“, со концертен настап на „Macedonian Free Society“ и со еден од највозбудливите музички проекти – „Поетроника“.
