Инфлацијата во април се намали на 13 отсто и ако се спореди со октомври 2022 година ќе видиме дека има речиси 7 отсто намалување на инфлацијата. Тоа значи дека мерките на Владата дале сериозен ефект врз ублажување на кризата, смета министерот за економија Крешник Бектеши.
–Разликата во трошоците за живот и цени на мало за храна и безалкохолни пијалоци е падната за 5,2 отсто во периодот од март 2023 до април 2023 за еден месец. Ако во април инфлацијата на храната била 21,7 отсто, сега е 16,5 во април. Тоа значи дека мерките го дадоа својот резултат. Тоа не е само поради делот на замрзнување на цени, туку и во делот на контролирање на ланецот на трговијата, почнувајќи од производителите па до потрошувачот, смета Бектеши.
Министерот порача дека треба да бидеме горди на фактот што Македонија во регионот е најевтина земја во делот на прехранбени производи и нафтени деривати.
-Иако нафтените деривати се берзански производи, секоја Влада има простор процентуално да влијае во утврдување на цените, посебно во делот на фискалните политики каде што влегуваат акцизите, ДДВ-то, па и другите царински давачки. Имаме простор да донесуваме вакви одлуки за да ги амортизираме високите цени, рече Бектеши.
Бектеши е уверен дека трендот на намалување на цените на храната ќе продолжи и понатаму, затоа што се намалени како што рече тој, трошоците на производителите за репроматеријалите, електричната енергија и за гориво.
Само од октомври 2022 до крајот на април годинава имаме намалување на цените на прехранбени производи со 14,7 отсто, што е поголемо намалување од зголемувањето на платите во овој период во нашата држава.
