Најголемата ѕвезда во дресот на италијанскиот калчо гигант Милан, Златан Ибрахимовиќ, и официјално се согласи идната недела да биде еден од главните водители на овогодишното издание на музичкиот фестивал во Сан Ремо.
Еден од најстарите и најреномираните музички фестивали во светот годинава ќе се одржи од 2 до 6 март, а Ибрахимовиќ ќе учествува на фестивалот четири денови.
Шведскиот интернационалец ќе биде на првиот ден на Сан Рено, следниот ден ќе игра првенствен натпревар со Милан против Удинезе, по што ќе се врати на музичкиот настан и ќе учествува до сабота, а в недела ќе патува со својот тим на дуелот против Верона.
Предвидено е во рамки на фестивалот, Ибрахимовиќ да исполни и музичка нумера во дует со тренерот на Болоња, Синиша Михајловиќ.
Раководните лица на Милан преку соопштение потврдија дека Ибрахимовиќ, за време на фестивалот, „ќе тренира во посебен објект“.
- Неколку тренинзи ќе пропушти, но ќе биде со нас за натпреварите. Доколку постои некој шампион, кој може да го поднесе сиот овој притисок, тогаш тоа е тој, изјави тренерот на „росонерите“, Стефано Пиоли.
