Македонската ракометна репрезентација за играчи до 19 години го претрпе третиот пораз на Светското првенство кое се одржува во Скопје. Избраниците на селекторот Данило Брестовац, во последното коло од Ц-групата беа торпедирани од селекцијата на Јапонија со 31:22. Овој пораз ги зацементира на четвртата позиција во групата и во осминафиналето ќе ги одмерат силите со првопласираниот тим од Д-група, репрезентацијата на Португалија. Европските Бразилци се хит на првенството, откако дојдоа како замена за Австралија, која се повлече од Мундијалот. Португалија играше во група со европски репрезентации и заврши без пораз, во групната фаза славеа над Германија, Исланд, Србија, Тунис и Бразил. Токму затоа ќе бидат фаворити во осминафиналниот дуелот против „црвено-жолтите“, кој на програмата е утревечер (20:30 ч) во СЦ „Борис Трајковски“.
Осминафиналниот натпревар меѓу Македонија и Португалија (која е непоразена досега на шампионатот) се игра утревеч (20:30 часот) во СЦ „Борис Трајковски“
-Не успеавме да ѝ парираме на Јапонија. Пак доаѓа до моето мислење дека ракометот кој се игра надвор од Европа ни е проблематичен. И со Јапонија и со Нигерија и со Бахреин не може да парираме со брзина. Сега, ако барам каде е вината… не знам. Ние во Македонија немаме ракомет на брзина, на техника. Почнуваме од основните работи, не можеме тркачки и технички да парираме. Имаме проблеми со техничката и брзинската подготовка. Противникот беше трипати побрз од нас. Технички, беа доведени до совршенство. Ние сме научени на европски ракомет, малку побавен шаблонизиран. Ние во Македонија играме шаблонизиран ракомет, учиме акции и комбинации, да се знае каде е блокада, каде е вишокот. Кај неевропските селекции гледам друг начин на ракомет. А, ние немавме ниво да ѝ парираме на Јапонија, изјави Брестовац по натпреварот.
Распоред и сатница на осминафиналните натпревари – утре играат: 14:00 часот: Аргентина – Германија (Борис Трајковски); 14:00 часот: Египет – Словенија (Јане Сандански); 16:15 часот: Исланд – Јапонија (Борис Трајковски); 16:15 часот: Хрватска – Унгарија (Јане Сандански); 18:30 часот: Данска – Тунис (Борис Трајковски); 18:30 часот: Франција – Норвешка (Јане Сандански); 20:45 часот: Португалија – Македонија (Борис Трајковски); 20:45 часот: Шпанија – Шведска (Јане Сандански).
