Шефовите на дипломатиите на Бугарија Екатерина Захариева, на Грција Никос Дендиас, на Романија Рамона Манеску и на Хрватска Гордан Грлиќ – Радман на средбата одржана во Њујорк во рамки на Генералното собрание на Обединетите нации дале категорична поддршка за Макеоднија да ги стартува преговорите во ЕУ заедно со Албанија.
Од бугарското Министерство за надворешни работи, соопштуваат дека првите дипломатии на овие четири балкански земји членки на ЕУ на средбата направиле преглед на европската интеграција на соседните држави кандидати за членство во Унијата.
Таа посочила дека како што Грција своевремено им помагала на Бугарија, Романија и Хрватска во процесот на евроинтеграција, сега е време тие заедно да ги поддржат и другите држави во регионот да станат дел од ЕУ.
– Бугарија потпиша Договор за пријателство со Република Северна Македонија и тој треба да се спроведе. Албанија, пак, треба да го подобри законодавството и да го усогласи со европското. Бугарија го поддржува започнувањето на преговори за членство и со двете држави, истакнала Захариева.
Од друга страна пак Грчкиот министер за надворешни работи Дендиас нагласил дека Грција излегува од десетгодишната криза за време на која беше ориентирана кон себе, но сега повторно ќе се ангажира на надворешен план на Балканот и со европските теми.
– Ги поддржуваме Албанија и Северна Македонија за членство во ЕУ, изјавил Дендиас.
Шефот на романската дипломатија Манеску се заложила Бугарија, Грција, Романија и Хрватска да продолжат да ги координираат активностите околу политиката на проширување на ЕУ.
– Треба да ги поддржиме нашите соседи и да го продолжиме ангажманот со кој Бугарија го водеше тој процес за време на своето претседавање со ЕУ. Раздвојувањето на Албанија и Северна Македонија ќе биде голема грешка и сметам дека е дојдено време двете земји да добијат позитивен сигнал, рекла Манеску.
Поддршка стигнала и од хрватскиот министер за надворешни работи Гордан Грлиќ – Радман кој го поддржал започнувањето на пристапните преговори со Скопје и Тирана.
