Албанскиот претседател, Илир Мета, денеска го прими амбасадорот на Северна Македонија, Данчо Марковски, кој му ги предаде акредитивните писма, информираа од кабинетот на Мета.
Додаваат дека претседателот Мета му посакал успех на амбасадорот Марковски во неговата дипломатска мисија во Албанија, во „корист на понатамошното зајакнување на многу добрите односи меѓу двете земји и нашите народи“.
Исто така, го истакнал значењето од поблиска економска и трговска соработка, преку билатерални и регионални проекти за инфраструктурно поврзување, особено за придобивките на граѓаните од прекуграничните области.
–Претседателот Мета го увери амбасадорот Марковски дека Албанија останува заинтересирана за напредок, благосостојба и стабилен напредок на Северна Македонија во процесите на евроинтеграција и изрази убедување дека нашите две земји, сојузници во НАТО и со заеднички евро-атлантски визии, уште повеќе ќе ги зајакнат односите во корист на мирот, стабилноста и развојот на регионот, стои во соопштението од претседателскиот кабинет.
Се посочува дека Мета ја смета заслужена безусловната одлука на ЕУ во март за започнување на преговорите, како „важен камен во километражата во патувањето на Северна Македонија кон европското семејство„ и гаранција за надминување на каква било пречка во овој важен процес за неа и за целиот регион.
Шефот на албанската држава високо го оценил учеството на албанскиот фактор во институциите на Северна Македонија, како потврда за придонесот и континуираната поддршка на Албанците за важните реформи, евроатлантскиот пат, демократската стабилност на земјата и изградбата на мултиетничка држава.
Извор:МИА
