Кремљ сакаше да изврши атентат врз папата со полско потекло. Тој претставуваше голема закана за постоењето и опстанокот на Советската империја, на која и се закануваше Полска, и синдикатот на Солидарност. Ова во интервју за бугарската Нова ТВ го изјави поранешниот член на турската терористичка организација „Сиви волци“ Мехмед Али Агџа, кој на 13 мај 1981 година пукаше кон папата Јован Павле Втори, јави дописникот на МИА од Софија.
По тешката операција, поглаварот на Римокатоличката црква преживеа.
Агџа тврдеше дека негов соучесник е Сергеј Антонов, претставник на бугарската авиокомпанија Балкан во Рим.
Агџа беше уапсен и призна дека е извршител на обидот за атентат врз папата. Тогаш имаше само 23 години и тврди дека бил сам. Беше осуден на доживотен затвор. За време на судењето, Али Агџа го смени сведочењето и објави дека бил регрутиран од Бугарската државна безбедност за да го изврши атентатот.
„Поминаа четириесет години. Со текот на времето, вистината ќе излезе на виделина. Се разбира, Ватикан ја знае вистината. Веројатно американската влада го знае тоа, и Кремљ ја знае вистината. Се разбира, постојат два аспекта. Едниот е натчовечки. Натприродна вистина што Ватикан никогаш не ја објасни. Вистина поврзана со пророштвото на Фатима. Постои уште една вистина која има врска со Кремљ, па затоа тоа е долга приказна“, рече Агџа.
„Како што може да се види од документарците од тој ден, пукав двапати. Многу добро се сеќавам на овој момент … Само јас пукав, се гледа. Немаше потреба од други луѓе“.
Дописникот на МИА од Софија потсетува на контекстот во кој се случил обидот за атентат врз папата Јован Павле Втори, што се совпадна со последната фаза на Студената војна, а потоа беше измислена и „бугарската трага“. Варшавскиот пакт беше разнишан од протестите против поранешниот Советски сојуз во Полска, а Роналд Реган беше избран за претседател во САД, ветувајќи дека ќе ја уништи „Злобната империја“, како што тој го нарече Советскиот сојуз. Советскиот сојуз веќе го окупираше Авганистан, а во Полска Лех Валенса и неговиот антикомунистички синдикат Солидарност го тресат авторитетот на локалните комунисти. По судењето во Италија, Сергеј Антонов беше ослободен во 1986 година и почина сам во 2007 година. За време на неговата посета на Софија во 2002 година, папата Јован Павле Втори рече дека не верува во „бугарската трага“, со што се отстрани вината на Антонов и Бугарија.
Извор:МИА
