Адвокатите на холивудскиот актер Алек Болдвин и на другите продуценти на Rust бараат од судот да ја отфрли тужбата поднесена од сценаристката Мами Мичел, која беше на сетот кога Болдвин испука куршум што ја уби снимателката Халина Хачинс.
Во поднесокот до Вишиот суд во Лос Анџелес во понеделникот, адвокатите рекоа дека тужбата на Мичел треба да се отфрли бидејќи нема докази дека Болдвин или некој од продуцентите имале намера да предизвикаат штета, пренесува Ројтерс.
„И покрај обидот на обвинителот да ги прогласи за намерни наводите, ништо не укажува дека некој од обвинетите намерно извршил штетно однесување“, се наведува во поднесокот на адвокатот.
Во тужбата поднесена во ноември, Мичел тврди дека Болдвин требало сам да провери дали пиштолот е наполнет со боева муниција, а не да се потпира на помошникот директор кој тврдел дека револверот Colt 45 е безбеден за употреба.
„Наместо тоа, според нас, Болдвин избра да игра руски рулет кога пукал со пиштол без да го провери оружјето. Неговото однесување и однесувањето на продуцентите беше непромислено“, се наведува во тужбата против Алек Болдвин и неговите колеги, која Мичел ја поднесе пред Високиот суд во Лос Анџелес за нанесување емоционален стрес и намерна штета.
Во нејзината тужба беа именувани и оружарката Хана Гутиерез-Рид и помошникот режисер Дејв Холс.
Снимателката Халина Хачинс беше убиена, а режисерот Џоел Соуза беше ранет за време на снимањето на една од сцените од филмот Rust, во Ново Мексико, на 21 октомври 2021 година, кога Болдвин испука борбен куршум.
