Москва ќе оди во строго заклучување доколку бројот на новозаразени со Ковид 19 продолжи да расте, се наведува во декретот на руската влада, кој во вторник беше испратен на адресите на компаниите.
Уредбата, до која дошол московскиот портал themoscowtimes.com, се однесува на ресторани, продавници, музеи, како и суспендирање на планираните медицински процедури во периодот од 30 октомври до 7 ноември.
Регулативата стапува во сила доколку вкупниот број на нови случаи на Ковид-19 во главниот град во следните седум дена го надмине бројот на заразени регистрирани претходната недела.
Рускиот лидер Владимир Путин претходно ја одобри неработната недела од 30 октомври до 7 ноември, бидејќи руската работна група за коронавирус објави уште еден дневен рекорд од 1.028 смртни случаи во последните 24 часа.
Бесплатното патување на градската јавна транспортна мрежа за постарите граѓани и некои други групи, исто така, ќе биде суспендирано.
Мерките, наведени во документот како „краткорочно затворање“, ќе бидат најстрогите ограничувања против корона во Русија од пролетта минатата година.
Властите во Кремљ и Москва претходно ги отфрлија мерките за затворање, кои се непопуларни за руската јавност, иако бројот на нови инфекции постојано расте.
