Заменик претседателот на Владата задолжен за европски прашања, Бујар Османи, денеска оствари работна средба со новата aмбасадорка на Република Хрватска во земјава, Нивес Тигањ.
Средбата се остварува непосредно по вчерашното преземање на Претседателството со Советот на ЕУ од страна на Хрватска која ќе претседава во наредните шест месеци.
– Честитки за вашата нова позиција како амбасадорка на пријателска Хрватска во земјава. Навистина клучен период во кој ја преземате функцијата, за кој се надевам дека ќе можеме да го одбележиме и како историски за нашите две земји, особено за нашите европски интеграции, истакнал вицепремиерот Османи, стои во денешното соопштение од Секретаријатот за европски прашања.
Тој потенцирал дека Република Хрватска во континуитет изразува јасна поддршката за европските интеграции на Република Северна Македонија, и воопшто, поддршка за европската приказна на целиот Западен Балкан.
– Очекувањата се навистина големи, и ние сме свесни дека Хрватска ќе ги вложи сите напори за да го задржи процесот на проширување високо на агендата на ЕУ, како дел од севкупната поддршка кон регионот, што е веќе потврдено со најавениот мајски самит на ЕУ тематски посветен на Западниот Балкан, изјавил Османи.
За време на средбата Османи и Тигањ соговорниците ја реафирмираа взаемната поддршка и пријателските односи меѓу двете земји, за кои изразија уверување дека ќе продолжат позитивно да се развиваат и во иднина.
