Повикувајќи се на извештаите на хуманитарните работници на терен, Обединетите нации денеска предупредија дека здравствениот систем на Јемен практично е во колапс, додека коронавирусот се шири низ целата земја.
На прес-конференцијата во Женева, портпаролот на Канцеларијата на ООН за координација на хуманитарните работи Јенс Лерке изјави дека ситуацијата е „крајно вознемирувачка“, пренесува Би Би Си.
Тој додаде дека хуманитарните агенции посочуваат дека, делумно поради недостиг на лична заштитна опрема за персоналот, дел од населението не е во можност да добие лекарска помош.
Јеменските власти потврдија десетици случаи на коронавирус, како и 30 смртни случаи, но ООН велат дека вистинските бројки се речиси сигурно многу повисоки.
Извор:МИА
