Во замрзнатиот канадски Јукон, рударите откопале мумифицирано младeнче од волк од леденото доба, за кое се верува дека е старо повеќе од 50 000 години, како и нецелосен труп на телето „карибу“ од истиот период.
Младиот волк е целосен примерок, со сè, вклучувајќи го недопреното крзно и опашка, но телето „карибу“ е само мумифицирана предна половина на животното.
„Според наши сознанија, ова е единствениот мумифициран волк од ледено доба некогаш пронајден во светот“, рече палеонтологот на владата на Јукон, Грант Зазула, за канадскиот CBC.
Зазула вели дека локалните палеонтолози се воодушевени од остатоците и дека примероците се едни од најстарите мумифицирани меки ткива на цицачи во светот.
