Аеродром добива нови простори за спорт, рекреација и активен живот. Во паркот „Патрик“ е поставена првата од вкупно петте нови фитнес-зони што ги планира Општина Аеродром за оваа година, со што продолжуваат активностите за создавање современи и достапни услови за физичка активност на отворено.
Во следниот период, ќе бидат поставени нови фитнес-зони и во Острово, Ново Лисиче, Тодор Чангов и во Долно Лисиче, со што граѓаните од повеќе населби ќе добијат можност за вежбање во непосредна близина на своите домови.
Од Општина Аеродром информираат дека се опремени фитнес-зоните со систем на справи наменети за калистеника и вежбање на отворено, кои овозможуваат различни видови физичка активност и може да ги користат граѓаните од различни возрасни групи и со различно ниво на физичка подготвеност.
– Сакаме Аеродром да биде општина во која активниот и здрав начин на живот ќе биде достапен за сите. Со поставувањето на новите фитнес-зони, создаваме места каде што граѓаните може бесплатно да вежбаат, да се рекреираат и да поминуваат поквалитетно време во својата населба. Особено ми е важно што се наменети овие содржини за сите генерации – од младите до повозрасните граѓани што сакаат да останат физички активни – изјави градоначалникот на Општина Аеродром, Дејан Митески.
