Општина Илинден направи агрохемиска анализа на обработливата почва

Извештајот од извршените анализи на почвените проби што се зедоа од неколку локации на територијата на Општина Илинден, во насока на поддршка и развој на земјоделството, бил во фокусот на работната средба на градоначалникот Александар Георгиевски и деканот на Земјоделскиот факултет, професор д-р Миле Маркоски.

Од Општина Илинден соопштија дека агрохемиските испитувања ги реализирала акредитирана лабораторија при Факултетот за земјоделски науки и храна во Скопје.

– Со овие анализи, земјоделците добиваат навремени и стручни информации за состојбата на почвата, што им овозможува поефикасно и поекономично користење на ѓубривата, подобрување на приносите и на квалитетот на производите, како и намалување на негативното влијание врз животната средина – наведуваат од локалната самоуправа.

Оттаму додаваат дека на состанокот биле разгледани повеќе аспекти поврзани со процесот на пошумување, вклучително и изборот на соодветни садници, процената на состојбата на теренот, мерките за заштита од ерозија, како и долгорочните активности потребни за успешно обновување на шумскиот фонд.

Воедно, како што велат од Општина Илинден, деканот дал стручно мислење и препораки за понатамошните активности, при што ја нагласил важноста од научно заснован пристап, користење соодветни автохтони видови и спроведување мерки што ќе обезбедат одржлива и квалитетна обнова на опожарените подрачја.

– Активноста претставува дел од Стратешкиот план за развој на Општина Илинден за периодот 2022–2026 година и ќе продолжи да се реализира и во иднина, со цел да се опфатат поголем број земјоделски површини и да се обезбедат попрецизни податоци за квалитетот на земјиштето на целата територија на Општината – потенцираа од локалната самоуправа.

Притоа, информираа дека резултатите од извршените анализи се достапни за јавноста и може да се најдат на официјалната интернет-страница на Општина Илинден.