Националниот парк „Шар Планина“ доби донација на противпожарна опрема од Владата, преку Дирекцијата за заштита и спасување (ДЗС), која ќе придонесе за поефикасна превенција и првичен одговор при пожари на отворен простор.
– Опремата, која вклучува противпожарни метли и грбни прскалки за гасење пожари, ќе биде ставена во функција на нашата ренџерска служба и ќе претставува значајна поддршка во заштитата на шумите, пасиштата и природните вредности на Шар Планина – велат од НП „Шар Планина“.
Оттаму упатија искрена благодарност до Владата и до ДЗС за оваа вредна донација и за континуираната поддршка во јакнењето на капацитетите на националните паркови за превенција и справување со шумски пожари.
– Во услови на сè почести екстремни временски појави и зголемен ризик од пожари, секоја инвестиција во превенција и опрема значи поголема безбедност за природата, посетителите и локалното население. Ќе продолжиме да инвестираме во обука, опремување и унапредување на капацитетите на нашите вработени, затоа што заштитата на Шар Планина е наша заедничка одговорност, а природното богатство што ни е доверено заслужува највисоко ниво на грижа – нагласуваат од НП „Шар Планина“.
